Барселона синоќа по продолженијата успеа да ја совлада Севиља со 3:0 и со тоа да ја анулира негативата од 2:0 од првиот натпревар и да се пласира во финалето од Кралскиот Куп.

Каталонците вчера одиграа одличен натпревар, исто како и во првенството против истиот противник пред неколку дена. Но, синоќешниот натпревар имаше поголема тежина, па поради тоа имаше и искри на теренот, но и на трибините.

Во центарот на вниманието повторно беше спортскиот директор на гостите Мончи, кој никако не можеше да се помири со поразот. Мончи влезе во нов конфликт со Роналд Куман, а кога играчите на Барса застанаа во негова одбрана, тој не се повлече.

Шпанските медиуми пишуваат дека тензијата се зголемила во оној момент кога претседателот на Севиља Пепе Кастро и директорот Мончи се нафрлиле кон првотимците на Барса, а спортскиот директор на Севиља се насочил и кон Лионел Меси, на кого му порачал: „Отсекогаш сте победувале со помош на судиите“, а Меси само кратко му порачал: „Смири се, ќе отидеш дома нервозен“.

Наводно, тоа уште повеќе го налути Мончи кој се обидел и физички да се пресмета со Меси, но неговиот помошник успеал да го спречи и да го испрати кон соблекувалната на Севиља.

Мончи по првенствениот пораз го нарече Роналд Куман плачко, а истото го направи и Сусо за Педри по првиот натпревар во Купот.