Познатиот ракометен стратег, Веселин Вујовиќ, во разговор за „Балкан Хендбол“, понуди дел од својата анализа и видувања за македонската репрезентација и резултатот кој го остваривме во Египет на овој Мундијал.

Начинот на кој Македонија ги загуби сите натпревари, им пречи на сите во Македонија и на оние кои го водат ракометот. Воопшто немаше борбеност и цврстина, враќањето во одбрана беше занемарен до таа мера, што секој од противниците постигнуваа лесни голови“.

„Говорот на нивното тело беше нешто кое не сум го видел. Неколкупати лицето на Кире кое беше во кадар, никогаш не сум го видел таков потиштен, како да се предаде, а кога Кире и Столе се откажуваат од борбата, тогаш останатите не можат ништо повеќе. Што се случи со нив, не знам, можеби и не очекуваа да одат на СП, па веројатно не беа добро подготвени“.

„Но тие мора да си направат подлабока анализа по Мундијалот, но и кога заминаа неподготвени, два меча можеа да ги добијат. Ќе мора да си изградат стратегија во иднина. Евидентно дека наскоро Кире ќе престане да игра со репрезентацијата, но што потоа? Потоп? Не треба така да се однесуваат и размислуваат. Не ја искористија еуфоријата со ракометот во Македонија, со титулите на Вардар во ЛШ. Без оглед што тоа беа странци кои играа за Вардар, но мораа да го искористат тоа. Токму поради тие резултати, тие можеа да имаат нови 300 или 500 деца во ракометот, во спротивно, сето тоа ќе им оди во друг план“, истакна Веселин Вујовиќ.

Вујовиќ ги искоментира и Талески и Кузмановски на овој Мундијал.

Талески целосно се загуби, тој прави технички грешки, не шутира, се глупира на терен. Отиде во Германија за да напредува, но напротив, назадуваше, се изгуби, па го разбирам тренерот зошто го вади постојано од игра. Во разговорот со Михајлов кога го составуваа тимот на Вардар, му посочив дека би било добро да го вратат Талески, да ги враќаат македонските ракометари дома, за да може подоцна да напредуваат и да се подигнат, но Талески целосно се загуби. За Кузмановски, тој беше некоја светла точка, но имаше многу сивило околу него. Македонија мора да најде играчи од тимот на Велко Марковски и Ацо Јоноски, тие имаа срце како еден автобус, беа вистински бедеми, ја држеа одбраната цврсто. Мора да најдат и пивотмен од два метри кој би играл во два правци, затоа што Пешевски и Столе кои се одлични со габаритот кој го имаат, не можат да успеат да се вратат назад во одбрана. Но тоа е прашање за Мукаетов и сите во македонскиот ракомет“, истакна Вујовиќ.