Македонија ги живее најцрните денови откако почна пандемијата, а СДСМ се спрема за избори. Власта наместо да ги заштити граѓаните свесно ги турка во црни избори во кои кој ќе преживее ќе раскажува. Вчера починаа 39 лица од корона вирусот, а 1.237 беа новозаразени, што значи дека државата е влезена во критична фаза на пандемијата. Но, изгледа дека СДСМ не смета така. Власта по прашањето за локалните избори во Штип и Пласница ги занемарува овие црни бројки. Како да не се загубени 39 животи во текот на вчерашниот ден, како сето тоа да е нормално, како да не се заразени нови 1.237 лица кои се 41 пат повеќе од оние 30 за кои се креваше паника за време на првиот бран. Додека од една страна се прават дека не постојат овие застрашувачки бројки, од друга страна се воведува кризна состојба, како што беше образложено заради спречување на ширење на КОВИД-19 и да не се загрозува безбедноста на здравјето на граѓаните. Тогаш, како е возможно да се организираат избори во Штип и Пласница, во период кога веќе е прогласена кризна состојба? Дали тие граѓани на Штип и Пласница се нешто помалку од другите? Дали тие се граѓани од втор ред што за нив власта и пред се министерот за здравство Венко Филипче и Комисијата за заразни болести, сметаат дека може да има избори? Само Штип вчера имаше 55 новозаразени и еден починат, изминатите три дена има 141 новозаразен и 5 починати, а во моментов има 525 активни случаи од кои 56 се на болничко лекување. Прашање е само уште колку граѓаните ќе се заразат и ќе починат до фамозниот 13 декември кога СДСМ сака да ги одржи изборите. Едно е сигурно дека водење на кампања се зголемува ризикот за зараза, а тоа значи дека овие бројки за Штип лесно може да станат катастрофални. Кога сме дојдени во ситуација да се бара од граѓаните да не се излегува надвор без потреба, да нема групирање на повеќе од 4 лица, тогаш најмалку што треба е водење на кампања каде постојано ќе има групирање но и контакти на многу луѓе за кои никој не може да гарантира дека нема да го шират вирусот. Сепак, СДСМ не смета така. Од една страна токму власта, министерот Филипче и првиот човек на Комисијата за заразни болести, Караџовски ги обвинуваат граѓаните за неодговорно однесување, од друга страна истите луѓе ги туркаат во црни избори и им ги загрозуваат животите на граѓаните. Одговорноста треба да почне од најгоре, од власта. Опозициските партии се откажаа од изборите и повикаа на разум, да не се загрозуваат граѓаните. ВМРО-ДПМНЕ; Алијанса за Албанците и Алтернатива, како и Левица, ГДУ и Единствена Македонија, побараа одложување на овие локални избори, затоа што е премногу опасен период за нивно одржување. Но, граѓаните на Штип и Пласница немаат таква среќа и владејачките партии разумно да размислуваат и да се откажат од намерата. Многу граѓаните ќе бидат изложени на ризик, многу граѓани на овие две општини не по своја вина ќе бидат заразени и ќе им бидат загрозени животите. Македонија е во најкритична состојба каде болничките капацитети се преполни и веќе е невозможно да им се помогне на сите. Затоа, за овие две општини ова ќе бидат избори за кои нема да се знае кој ќе ги преживее.