Иако со натпревар повеќе од Сити, Манчестер Јунајтед останува лидер на табелата во Премиер лигата и по денешното тешко гостување кај Фулам.

Победи со 2-1, но исклучително се намачи против екипата која требаше да биде аутсајдер на овој меч. Не само затоа што Фулам поведе по само четири минути игра преку Лукман, туку и затоа што во финишот изврши тотална инвазија по голот на Јунајтед.

Гостите прво израмнија преку Кавани во 21., а во 65. минута Погба го постигна својот најубав гол во дресот на Манчестер Јунајтед. Но, место да продолжи со напаѓачката игра, тимот на Оле Гунар Солскјер се повлече на својата половина и му овозможи на домаќинот да создаде неколку екстра шанси.

Се истакна Давид де Геа со атрактивни одбрани, но и фудбалерите на Фулам се виновни што не освоија барем бод од овој меч. Со победата, Јунајтед остана на првата позиција на табелата, со два бода повеќе од Сити, а во следното коло го пречекува најслабиот тим во лигата Шефилд Јунајтед.