Европскиот првак и лидер во Бундеслигата, екипата на Баерн, го пречека Вердер, но на крајот поради своето слабо издание успеа да дојде само до бод.

Гостите од Бремен поведоа во завршницата од првиот дел со голот на Егестајн, но во продолжението Коман успеа да постигне гол за израмнување. Баерн не успеа во преостанатите 30-тина минути да дојде до победата. Овој меч беше одбележан и од повредата на Лукас Ернандез. И покрај киксот, Баерн со 19 бода останува лидер во Германија.

Со лошите игри продолжи и Шалке, кој забелжа пораз во Гелзенкирхен од Волфсбург со 2:0. Вегхорст и Шлагер уште во првите 24 минути го решија победникот.

Најефикасен меч се одигра во Синсхајм каде Хофенхајм одигра 3:3 против Штутгарт. Кемпф длабоко во судиското надополнување донесе бод за гостите, за кои целиот меч на клупата за резерви го одгледа Дарко Чурлинов.

Арминија загуби со 2:1 од Баер Леверкузен, додека Борусија Менхенгладбах пропушти шанса да го победи Аугзбург и покрај тоа што имаше играч повеќе, па на крајот мечот заврши 1:1.