Атлетик Билбао е сензационален освојувач на трофејот во Суперкупот на Шпанија, откако во вечерашното финале ја совлада Барселона по продолженија со 3-2.

Каталонскиот гигант два пати имаше водство, во двата случаја со головите на Гризман, но не издржа да ја прослави победата. Во првиот, Атлетик веднаш израмни преку Де Маркос, а во вториот, до 2-2 дојде во 90. минута со голот на Виљалибре. Кога веќе се избори за продолжение, баскискиот тим дојде до победата благодарение на прекрасниот погодок на Ињаки Вилијамс во 93. минута.

Со ова Атлетик повторно се покажа кобен за Барселона во куп-натпреварувањата. Во 2015 година ја совлада со вкупни 5-1 во Суперкупот, а лани ја елиминира и од Купот, со триумф од 1-0. „Каталонците“ повторно останаа без трофеј кој во своите витрини го чекаат од 2019 година.