Манчестер Јунајтед ја почна новата сезона со неочекуван пораз на домашен терен од Кристал Палас со 1-3.

Колку е сензационален, толку овој резултат е болен за „ѓаволите“ бидејќи го одбележа еден исклучително интересен и контроверзен момент. При водство на гостите од 1-0, Ајев промаши пенал, поточно неговиот удар го одбрани Давид де Геа. Ударот од белата точка мораше да биде повторен затоа што шпанскиот голман не ја допирал гол-линијата при изведувањето на пеналот.

Во вториот обид шутираше Заха и тој не му даде шанса на Де Геа да одбрани. На фотографиите се гледа дека станува збор за милиметри, а изненадува ваквата одлука на судиите од ВАР собата и главниот арбитар ако се знае дека во Премиер лигата често не се почитуваат стриктно правилата и се дозволува послободно однесување од актерите на теренот.