Играчите на Пари Сен Жермен му го вртат грбот на Нејмар, а француски „Л’Екип“ денеска пласира информација која дополнително ќе ги вжешти страстите во соблекувалната во која нема мир.

Според сознанијата на угледниот француски весник, некои играчи во соблекувалната сметаат дека Нејмар некои работи ги прави намерно, дека е себичен и размислува само на себе си.

Капката која ја прелеа чашата е последниот црвен картон на мечот против Лил, каде Нејмар ги помина сите граници. Бразилецот ги остави соиграчите на цедило во финишот од натпреварот, но тоа не е единствениот проблем за играчите на „Светците“, туку фактот дека традиционално не може да се исконтролира и секогаш прави дополнителни скандали по натпреварите, па и сега му се заканува долга суспензија.

„Л’Екип“ истакнува дека Нејмар не ја научил лекцијата, бидејќи во една прилика поради слично однесување доби 12 натпревари забрана за играње.

Се додава и тоа дека Нејмар има посебен третман кај секој тренер, дека за него важат други правила и дека никој не може да го скроти неговиот темперамент.

Наводно испливало и тоа дека Тухел прв почнал да попушта пред ексцесите на Нејмар, а Покетино продолжил по истиот принцип и дека тоа ја поделило соблекувалната.

Треба да се потсети и дека повторно е актуелна приказната околу неговото враќање во Барселона, дека Нејмар сака повторно да игра со Меси и дека го стопирал процесот за продолжување на соработката со Парижаните до 2026 година, кој одамна е во подготовка.

Не треба да се заборави ниту тоа дека „Л’Екип“ традиционално е наклонет кон Парижаните, па ваквите информации и вперување со прст кон Бразилецот значи дека навистина постојат некои проблеми, односно дека Нејмар претстсавува главоболка за клубот.