Екипите од Ла Лига доминираа цела деценија во европските купови, Реал и Барселона освоија шесте од десетте титули во Лигата на шампионите во периодот од 2011 до 2020 година, два пати се играше шпанско финале во ова натпреварување, а и од Лигата Европа трофеите одеа на Пиринејскиот полуостров.

Од лани, ситуацијата е тотално променета. Минатата сезона ниедна екипа од Шпанија не успеа да дојде ни до полуфиналето од ЛШ, а лошите резултати продолжуваат и сега. На првите три меча од осминафиналето, сите шпански екипи загубија на домашен терен: Барселона од ПСЖ, Севиља од Борусија Дортмунд и Атлетико од Челси и сите се пред елиминација од елитното натпреварување.

Честа може да ја спаси само Реал кој, пак, се соочува со тешки играчки проблеми, пола екипа не му е на располагање на Зинедин Зидан пред двомечот со Аталанта. Многу лесно може да се случи меѓу осумте најдобри во Лигата на шампионите да нема ниедна шпанска екипа. Последен пат такво нешто се случи во сезоната 2004/05.