Истекува првиот квартал од годината, а македонските власти се уште не го откриваат датумот за тоа кога ќе пристигне првата поголема пратка на вакцини за почеток на имунизацијата на населението. – Министерството за здравство кратко одговара дека како и досега, навремено ќе ја информира јавноста, за следните испораки на вакцини против Ковид 19. Во очекување на првата голема пратка, во регионот почна масовната имунизација. Србија вакцинираше 28 на 100 лица, а српските државјани имаат опција да одберат која вакцина сакаат да ја примат. Следуваат Грција и Словенија со 12, Хрватска со 6 и Бугарија со четири на 100 луѓе. Под 1 е стапката само во Албанија и Црна Гора. Податоци пак за Македонија не се достапни на сајтот на „Our World In Data“. Меѓутоа, во БиХ веќе се знае кога ќе пристигнат големите пратки. Оваа држава нарачува 350.000 дози од „Спутник“ по цена од околу 6 милиони евра. Преку КОВАКС системот на 23 март во Босна и Херцеговина ќе пристигнат нешто над 24.000 дози, на 29 март 36.000 од „Фајзер“, а на 22 април уште 76.000 дози од „АстраЗенека“. Со оглед на недостатокот на информации од македонските здравствени власти, Сител се обиде да добие одговор од КОВАКС системот кога можеме да ја очекуваме првата пратка, и за колку точно дози станува збор, со оглед на конфузните изјави во земјава. Меѓутоа, оттаму за Сител велат дека одговорот треба да се очекува утре. Во Македонија до вчера до 15 часот вакцинирани се 4.556 здравствени работници. Досега пристигнаа нешто над 8.000 дози на „Фајзер“ донација од Србија и 3.000 на „Спутник“. Иако беше најавено дека со последната пратка од Русија ќе започне имунизацијата на населението, засега се вакцинираат само медицинските лица.Извор: Лидер