МОТИВИРАН СУМ ЗА ПОЗИТИВНИ ПРОМЕНИ


МОТИВИРАН СУМ ЗА ПОЗИТИВНИ ПРОМЕНИ

Време е да ставиме крај на поделбите, да ставиме крај на лошите одлуки, да ставиме крај на лошите решенија. Ќе водам позитивна кампања затоа што силно верувам дека во кампањата треба да бидеме тоа што сме и јас од тоа нема да остапам.

Интервју со д-р Александар Стојкоски, кандидат за градоначалник на општината Ѓорче Петров

Ве познаваат како доктор, бевте пратеник во Собранието, претседавач на Советот на општината, но во суштина, кој е Александар Стојкоски?

Семеен човек, кому речиси сите животни спомени се поврзани со Ѓорче Петров. Женет, татко сум на две деца, на Влатко и Бојан. Точно, по професија сум лекар, работам веќе 13 години, ја сакам мојата работа, пред се затоа што е хумана и имам можност да комуницирам со сите луѓе, да ги сослушам и да им помогнам.

Што Ве поттикна да се кандидирате за градоначалник?

Сакам принципите на мојата професија: хуманост, неселективност и еднаков пристап кон проблемите на секој поединец да бидат втемелени во работењето на општината. Лично верувам дека во животот можеме да направиме безброј добри дела, само ако при тоа не се ограничуваме на тоа кој ќе ги добие заслугите. Силно сум мотивиран да работиме и да направиме позитивни промени во општината. Сметам дека можам да придонесам за промени во мојата општина, а преку тоа и за мојот роден град. Млад сум, имам силна енергија, имам постигнато доста резултати на професионален и приватен план, нема никогаш да се одалечам од мојата примарна професија, но можноста да се даде нешто повеќе за општеството и државата се ретки и затоа се нафатив во следните четири години да се вложам целосно во овој предизвик.

Дали сметате дека во моменти на силна поларизација на општеството и граѓаните можете да бидете градоначалник на сите граѓани на општината?

Немам никаква дилема по однос на ова прашање. Силно сум мотивиран да ги вклучиме сите луѓе без при тоа да бараме било каков политички активизам и партиско експонирање. Планирам да го вклучиме целиот човечки, интелектуален потенцијал, на секој еден човек од Ѓорче, сите професионалци, занаетчии, правници, пазарџии, економисти, приватни стопанственици, инжинери, лекари, архитекти, наставници, спортисти и уметници. Знаете, годините си врват, и жално е што и после толку години, ние се уште се занимаваме со прашањата   кои се од егзистенцијална природа. Дали некоја улица треба да добие асфалт, дали треба да се направи соодветна канализација, дали треба да добиеме детска инфраструктура, градинки, училишта, игралишта, дали треба да се подобри состојбата со хигиената или зеленилото и слично. Ова се основни функции и надлежности на секоја општина. Мојата визија е не само да ги извршуваме основните функции на општината, туку и дополнително да ја унапредиме.

За таа цел, уште од моментот кога се нафатив да бидам кандидат за градоначалник, со мојот тим, кој е инклузивен, и вклучува лица со големо и разнолико искуство, создадовме програма и визија како да се подобри квалитетот на живот на жителите на општината.

Кои се приоритетните области во коишто ќе ја насочите Вашата енергија? Дали веќе имате и конкретни проекти во програмата?

Во изминатиот период мојот тим и јас, собравме над 1.000 идеи од  граѓаните, изминатиов период примив стотици, стотици пораки, остваривме многу средби со поединци и групи на граѓани кои имаат големи проблеми за кои никој не нашол време да ги слушне , ниту пак понудил решение во изминативе години.

Мојата визија се темели на три главни столба: одржливо управување и заштита на животната средина; технологии и иновации во функција на достапност на услуги за сите граѓани; и одржливо планирање и реализација на инфраструктура.

Сакам да направиме општина во која ќе има функционален систем, во која нема да треба да се бараат врски за уписи во градинка и училиште или да мора да имате врски за да добиете и основен документ од општината. Ова е прво прашање со кое ќе се занимавам уште од првиот ден и се надевам на брза и ефикасна реализација. 

Мојот фокус како и секогаш ќе биде здравјето на сите луѓе преку заштита и развој на здравата животна средина. За таа цел предвидувам развој и реставрација на над 20.000м2 нови паркови површини низ целата општина. Ветувам нов централен парк кој ќе биде најубав во целиот град.

Сакам општината Ѓорче Петров да стане белите дробови на град Скопје и нескромно ќе ја кажам мојата цел, а тоа е долгорочно да засадиме „1 000 000 нови дрвја – садници во Ѓорче“, на цела територија, проект во кој ќе се вклучи целата заедница, секое семејство, секое училиште, секоја градинка, проект кој ќе го реализираме со сите заедно. Проектот „Ѓорче Петров без кал“, проект со кој ќе ги опфатиме  неасфалтираните улици,  нешто што е и секојдневна обврска во работата на општината. 

Следно, а особено важно – нема повеќе да се носат детални урбанистички планови шверцерски и со брзина на светлината. Плановите ќе се носат инклузивно по широка стручна дебата со експерти и со граѓаните. На прво место ќе биде интересот на граѓаните. Ѓорче треба да се развива, но онаму каде што може и каде што нема да се загрозуваат основните човечки потреби за нормален живот. Време е Даме Груев, Волково, Ново Село, Орман, Никиштани и Кисела Јабука да добијат друга сообраќајна артерија освен мостот во Даме Груев. Ќе го отвориме Ѓорче со нови сообраќајни артерии и ќе ги решиме тесните грла.

Исто така, имаме предвидено проекти за замена на азбестните кровови на објектите на општината (градинките, училиштата и други јавни објекти), затоа што тие претставуваат сериозна закана за јавното здравје, како и проекти за енергетска ефикасност преку реновирање на фасадите на објекти кои се во критична состојба. Планираме и замена на начинот на затоплување на сите јавни објекти кои придонесуваат кон загадување на животната средина.

Кои се Вашите планови за помладите, а кои за повозрасните жители на општината?

Младите луѓе ќе добијат содржини, услови, проекти и простор за работа. Младите брачни парови повеќе нема да ги шетаат своите дечиња на небезбедни површини и окупирани тротоари. Секое населено место ќе добие содржина која ќе ги исполнува овие потреби, а наскоро ќе видите и визуелизација на овие решенија. Ќе предвидиме и две нови детски градинки и надградба на постоечките со цел да се зголеми капацитетот, а ќе воведеме и јавно достапни списоци за упис на дечињата (со заштита на личните податоци) со цел да се спречи манипулација во редот на нивото запишување.

Сериозно ќе пристапиме и на најискусните, на пензионерите. Здружението на пензионери ќе ме има како прв соработник и пријател. Да ги удостоиме со достоинствени услови за нивните пензионерски денови. Ќе ги кренеме пензионерските клубови во секое населено место на едно повисоко ниво. Возрасните лица заслужуваат достоинствен третман од страна на општината. 

Исто така, спортистите ќе добијат во мене дел од својот тим. Страствен вљубеник на спортот сум. Трчам маратонски трки, сум учествувал на многу натпревари. Исто така, планинарам и возам велосипед. Од нашата општина потекнуваат бројни познати спортисти. За спортот, како и за многу други професии, талентот не е доволен. Треба многу работа, а за тоа се потребни услови. Ќе вложуваме во спортската инфраструктура. За таа цел ќе го реализираме проектот Спортски центар во Хром. Со ново фудбалско игралиште по стандардите на ФИФА, нови тениски терени и трим патеки за рекреација. Но, исто така, ќе се посветиме и на маалските игралишта. Ќе ги реновираме постојните каде е тоа потребно, а планираме и изведба на нови онаму каде што недостасуваат.

Граѓаните имаат секогаш големи очекувања од органите на централната и локалната власт. Еден од главните проблеми, покрај инфраструктурните, е и севкупната економска состојба. Немате големи надлежности, но дали сте размислувале за ова прашање?

Секако. Поучен од искуствата кои ги видов и добив во САД, со мојот тим разработивме идеи во таа насока. Економските субјекти ќе добијат отворен партнер за соработка. Општината Ѓорче Петров и јас како нејзин градоначалник ќе сториме се во своите надлежности за да привлечеме што е можно повеќе компании кои ќе отворат работни места. Фокусот ќе биде на одржлив економски развој, преку создавање на нова индустриска зона за лесна и незагадувачка индустрија. Во прва фаза, ќе направиме подготовка на теренот за заинтересираните инвеститори преку изведба на примарна и секундарна инфраструктура. Верувам дека доколку локацијата биде внимателно одбрана, а како што знаете, ние сме гранична општина која излегува на автопат и обиколница, со добра работа и поволни услови кои планираме да ги понудиме кон инвеститорите, можеме да привлечеме со сигурност бројни мали и средни претпријатија во нашата општина.

Исто така, планираме за компаниите од ИТ секторот да создадеме услови за технолошки хабови и да ги привлечеме да дојдат и да инвестираат. Граѓаните во Ѓорче Петров мора да добијат поголеми можности за вработување и за качување на нашиот стандард. Ќе донесеме сет на проекти и мерки кои ќе го олеснат патот на инвеститорите да инвестираат во општината.

Која е Вашата порака кон гласачите? Зошто да гласаат за Вас?

Можам да ви ветам многу работа, достапност, посветеност, соочување со проблемите, реални решенија, реализација на многу нови проекти за сите делови на Ѓорче. Континуирана работа, а не кампањски или само пред избори, затоа што лично сметам дека тоа е нечесно кон нашите сограѓани. Уште од првиот ден ќе работам како за една недела да има избори, а не како за четири години.

Време е да ставиме крај на поделбите, да ставиме крај на лошите одлуки, да ставиме крај на лошите решенија. Ќе водам позитивна кампања затоа што силно верувам дека во кампањата треба да бидеме тоа што сме и јас од тоа нема да остапам. На моите политички опоненти им посакувам добро здравје и достоинствена кампања. Ѓорче Петров заслужува да биде модерна и урбана општина, со решени основни проблеми, општина пример за сите други.