Просечна плата од над 27.500 денари и раст на примањата во земјава за 7% за една година. Ова го покажуваат последните податоци на државната статистика. Претходни бројки на истата институција пак покажуваат дека во периодот од април до септември бројот на вработени во земјава се намалил за над 25.000. Од друга страна, податоците со кои располага Синдикатот не покажуваат раст на платите на работниците во тешката 2020 година.

„Според чланарината што ја добиваме платите отприлика се исти, а многу луѓе останаа без работа или имаа намалени плати затоа што работодавачите ги искористија сите можни механизми за да исплатат пониски плати“, вели Иван Пешевски, потпретседател на синдикат за градежништво.

Просечната плата се пресметува врз основа на податоците од тие што примиле плата. Тука ги нема луѓето кои изгубија работа, вели Пешевски.

„Ако ги исклучиме платите на владините и државните службеници просекот нема да биде ваков. Сега на хартија имаме минимална плата од речиси 15.000 и просечна плата од 27.500, а работникот не го чувствува тоа“, вели Пешевски.

И Владата со соопштение се пофали со растот на платите од 7% или 1801 денар за една година.

„Владата во консултација со сите релевантни чинители во општеството, синдикати, комори, организации на работодавачи, креира амбиент за раст на просечната и на минимална плата во следните четири години. Посветени сме на реализација на стапките на економски раст од 4-5% и покачување на платите за 20% до 30% односно до 34 илјади денари во следните четири години со цел подобрување на стандардот на граѓаните и економијата во земјата“.

Фото за вовед: YouTube видео: Категорија: БизнисНовинар: Наташа Хаџиспиркоска Стефанова