Проф. д-р Докиќ: Има две групи на пациенти со COVID-19 Александра Спасеска 02.12.2020 / 08:17 Здравје

Скопје, 2 декември 2020 (МИА) – Проф. д-р Дејан Докиќ, пулмолог алерголог, синоќа во емисијата „Клик плус“ на ТВ21, истакна дека околу 80 проценти од заразените со коронавирусот го поминуваат во домашни услови, а во болниците доаѓаат оние кои се во тешка состојба и дека тие се сите со многу ниска сатурација.

– Секој кој доаѓа до болница, треба да се смета како ризичен, затоа што во принцип имаат ниска сатурација на крв. Тие веднаш мора да се стават на висок проток на кислород. Доколку сатурацијата и натаму паѓа, мора да се стават на неинвазивна вентилација. И тие главно имаат проблеми со респираторниот систем. Друга, пак, група, имаа проблеми со коагулацијата. Настанува коагулација на крвта, оштетување на капиларите насекаде во организмот, пред сè на белите дробови, во срцето. Некои добиваат миокардни инфаркти во мозокот или белодробна емболија. Но, она најстрашното е дисеминирана интраваскуларна коагулација, каде што сите крвни садови се зафатени со коагулими и не може да тече крвта. Кај некои настанува крвавење и завршуваат летално, објасни проф. д-р Докиќ.

Тој рече дека вирусот SARS-CoV-2 е многу непредвидлив и е опасен и за ризичните групи, но и за оние кои немаат коморбидитети.

– Има пациенти со неколку коморбидитети па се извлекле. Јас причината ја гледам во самиот имун систем и на кој начин тој успева да се бори. Вирусот е многу подмолен. Го измамува имуниот систем, кој добива погрешна информација. Тоа ви е како во некој центар на ЦИА, вирус влегува и ја пореметува целата компјутерска мрежа. Идентично се случува тука. Влегува SARS-CoV-2, го нарушува целиот програм на одбраната и организмот добива сосема погрешна информација и затоа прекумерно реагира со создавање на тие цитокини и таа позната цитокинска бура од која ретко некој се спасува, нагласи проф. д-р Докиќ.

коронавирус COVID-19 Дејан Докиќ Автор/Извор МИА Прикажи во метро On