Мицкоски што предложи пред некој ден да има лидерска средба во врска со бугарскиот договор не е прв пат, ова е втор пат. Јас ќе ве потсетам дека во касна пролет или рано лето кога се договараа датумите за изборите кога ќе бидат ВМРО-ДПМНЕ и Коалицијата предложија да прва точка на дневен ред кај претседателот на државата да биде што правиме во односите со Бугарија, а потоа да разговараме за избори, вели Љупчо Пренџов во вечерашното гостување во емисијата Само вистина на Канал 5 и додаде: „Тогаш Пендаровски принципиелно кажа дека не може да го стави како точка на дневен ред доколку сите партии не се согласни. И на прашањето кои партии не се согласни тој ни кажа дека премиерот Заев не е согласен како тогашен претседател на СДСМ.“ Пренџов додаде дека Македонија ќе доживее целосно фијаско доколку се направи истото со Договорот со Бугарија, како со Преспанскиот договор, односно како што рече тој ако го плаши изјавата на Заев, Пендаровски и натписите на Брисел Тајмс дека Европската комисија нема да биде посредник помеѓу Бугарија и Македонија, што за него не е добро за Македонија, укажувајќи дека во Македонија има министер за надворешни работи кој што кажува „па добро кое и да е решение со Бугарија да направиме, ќе ги релаксираме односите. -Ако повторно се затвориме во 5 луѓе како што беше со Преспанскиот договор, тоа сега се Димитров, Османи, Зоран Заев и уште некој од нивните кабинети, мислам дека ќе доживееме уште едно фијаско. Зошто? Од три аспекти, првиот аспект е, ме плаши денес Румен Радев претседателот на Бугарија вели дека не постои македонски јазик, дека Гоце Делчев е чистокрвен Бугарин, а потоа Заев возврати Бугарија нас ни е пријателска држава, а Гоце Делчев ако го немаше тогаш требаше да го измислиме бидејќи тој е мостот. Тие изјави мене ме плашат. Втор аспект е изјавата на претседателот Пендаровски денес кога кажа дека нема негации за македонскиот јазик од меѓународните лингвисти но има огромни негации за македонскиот јазик во околните политички кругови, претпоставувам мислејќи за Бугарија и трет аспект, многу важен, е тоа што денеска во Брисел Тајмс пишува дека Република Македонија и Бугарија мора да го решат спорот меѓусебно и дека Европската Комисија нема да посредува при решавањето на спорот, како Србија и Косово. И тоа не е добро за Република Македонија, бидејќи во Македонија имате министер за надворешни работи кој што ви кажува па добро кое и да е решение со Бугарија да направиме, ќе ги релаксираме односите, изјави Пренџов. Тој порача дека лидерите на политичките партии треба да седнат да ги постават црвените линии за Гоце Делчев бидејќи како што рече тој, Делчев е Македонец и од тоа отстапување нема. -Ние сме Македонци од Република Македонија, Гоце Делчев е Македонец и од тоа отстапки нема и час побрзо да се вразуми владата и да седнеме сите лидери на парламентарни партии во собранието, да заземе црвени линии и од тоа нема отстапување, порача Пренџов.