Иако има зад себе две шампионски титули во Англија, Барнли не е баш популарен клуб, но клубот од индустрискиот град од Ланкашир во последниве години успеваше да опстане во Премиер лигата со мал буџет. Тие станаа шампиони во 1960 година со тим од сопствената академија, со само двајца играчи од страна и на тој начин влегоа во историјата како најмал град кој ја освоил титулата во Англија.

Но, сето тоа е далечно минато, чекаа половина век повторно да бидат во фокусот, а во Премиер лигата за прв пат се пласираа кон крајот на минатата деценија, а од 2012 на клупата е Шон Дајш. Испаѓаа и се враќаа во лигата во два наврати. Често имаат најмал буџет во лигата, самиот тренер се откажувал од поголема плата за инфраструктурата да биде поправена, а по половина век се пласираа и во Европа, поточно во квалификациите, откако го освоија седмото место во првенството.

Имаше и проблеми меѓу Дајш и управата, причина се последните преодни рокови кога клубот не вложи речиси ништо, но работата на одличниот тренер ги одржа во елитата. Се зборуваше дека летоска ќе си замине, бидејќи нема сили да се бори со „ветерници“, но овој човек кој живее за фудбалот остана, иако многу брзо би добил понуда од некој поголем клуб.

Сега дојде крајот на неговите маки. Имено, Барнли има нови газди. Станува збор за Американци, инвестицискиот фонд „АЛК Капитал“ кој го предводи финансискиот гуру Алан Пејс. Човекот од Вол Стрит работеше во МЛС клубот, Реал Солт Лејк, голем поборник е за технологијата и вложување во млади играчи, се претпоставува дека неговото искуство многу ќе му значи на Барнли, вложувањата, но паметни, се подразбираат. Тој не е класичен љубител на „Манибол“, но е на технологијата и податоците кои можат да ги оптимизираат вложувањата и да допринесат за подобар скаутинг.

Дајш ќе добие засилувања веќе оваа зима. Барнли е во зоната на испаѓање, и иако обично се извлекуваат во втората полусезона, новите сопственици не сакаат да ризикуваат ништо, за нив би било лошо тимот да испадне во Чемпионшип. Прво нешто што им треба е напаѓач кој гарантира голови, едноставно тоа секогаш е најголемиот проблем на овој тим, не можат да купат квалитет.

Клубот е продаден за 250 милиони евра, претседателот Гарлик ќе остане некое време да ја олесни транзицијата, имаше и други понуди, од арапски, но и англиски бизнисмени, но во Барнли процениле дека Американците имаат најдобар пристап и дека гарантираат вложувања и стабилност.