Порто успеа да го елиминира Јувентус, а сега сака да се спротистави на уште еден фаворит. „Змејовите“ утре од 21 часот на неутрален терен во Севиља, на „Рамон Санчез Писхуан“ ќе го дочекаат Челзи. Пепе, капитенот на Порто, одигра брилијантно против Јувентус, а во пресрет на првиот меч од четвртфиналето во Лигата на шампионите посочи дека неговиот тим нема да потклекне ниту пред „Сините“.

„Имаат тим кој се проценува на 700.000.000 евра, но бројките не играат фудбал. Натпреварот добро го подготвивме и подготвени сме за утрешниот меч. Не играме на наш терен, но сме домаќини и со тој став треба да тргнеме во натпреварот. Ништо нема да биде готово во Севиља, се игра и реванш во Лондон“, вели Пепе.

Капитенот на Порто се потсети на двомечот со Јувентус и нагласи дека тој и неговите соиграчи не треба да живеат во минатото, туку да се фокусираат на Челзи.

„Мораме да бидеме свесни дека мечот со Јувентус заврши. Тој е дел од една убава приказна, но најважнен е овој следниот со Челзи. Не треба да се вртиме зад себе, туку треба да бидеме пожртвувани и сконцентрирани. Ние сме силен тим и ќе биде тешко да не елиминираат. Го покажавме тоа против Јувентус кога игравме 60 минути со играч помалку и поминавме понатаму. Бевме компактна екипа, го имавме на ум она што тренерот го побара од нас. Натпреварот против Челзи ќе биде друга приказна, ќе бидеме подготвени“, заклучи стоперот на „Змејовите“.