Ерата на Месут Озил во Арсенал дојде до самиот крај! После турбулентните седум и пол години, германскиот фудбалер со турски корени става крај на својот престој на „Емирати“ каде беше апсолутен миленик на навивачите, за денес да е пропадната суперѕвезда која сите чекаат да си замине.

Според информациите од Островот, Озил и неговите агенти практично ги договориле сите детали од разделбата со Арсенал и тој од соиграчите и клубот ќе се прости најверојатно најдоцна до утре. Озил пораид трансферот во Фенербахче се прости од преостанатите 8.500.000 евра, колку што Арсенал требаше да му исплати за преостанатиот дел од договорот и така практично го финансираше обештетувањето во клубот чиј навивач е од детството.

Фенербахче е под лупа на инспекторите бидејќи се потешко успева да ги испочитува правилата од финансискиот фер-плеј и веднаш пристигнала порака дека во касата нема пари да се плати ниту симболична сума за трансфер. Озил направи апсолутно се со цел да излезе од договорот со Арсенал шест месеци пред официјалниот крја, поради што има отворен пат кон Истанбул.

Поради тешката финансиска состојба во Фенер, дел од договорот на Озил ќе го финансира „Ексен Медија Груп“ чија централа е во Истанбул, а за возврат ќе добие дел од парите од правата за користење на неговиот лик и име во маркетиншки и рекламни цели. Озил за потпис ќе добие бонус од 5.000.000 евра, а годишно ќе добива 4.000.000 евра. Односно 14.000.000 за траење на целиот договор.

Спортскиот директор на Фенер и легенда на клубот, Емре Белозоглу, смета дека доаѓањето на Озил ќе биде вистински потег за клубот. Озил со Фенер ќе потпише договор на три и пол години и за него тоа ќе биде остварување на сонот.

„Фенербахче во Турција е исто што и Реал Мадрид во Шпанија. Најголемиот клуб во својата земја. Израснав како навивач на Фенербахче, иако живеев во Германија“.

Озил си заминува од Арсенал по 254 одиграни мечеви во сите натпреварувања, на кои постигнал 44 погодоци и има 77 асистенции. Во Арсенал пристигна во 2013 година кога „Топчиите“ за него го срушија клупскиот рекорд и го платија 47.000.000 евра. Со Арсенал освои четири ФА Купови.