Пратеникот од ВМРО-ДПМНЕ, Иван Јорданов вечерва во „Објектив“ на МТВ и посочи на Славјанка Петровска од СДСМ дека според законот за организација на државната управа не е предвидено ниту една институција во земјава да има врзан потпис, камо ли за пописот, па по тоа не треба да се манипулира со јавноста. -Согласно Законот за организација на државна управа нема ниту една институција која што е предвидена да биде со врзан потпис во Република Македонија, тоа што вие го спомнувате за здравствените институции не станува збор за заменик директор, тоа е менаџерски тим од директор економист и директор од редовите на здравството, тоа е сосема различно, тука станува збор за врзан потпис и одлука која се носи паралелно, немојте да манипулирате со јавноста, одговорно тврдам дека не постои друга институција во Македонија која има врзан потпис, ниту пак во светот постои за одлуки за попис, посочи Јорданов. Тој вели дека врзаниот потпис е политичка одлука која е донесена за да се задоволи коалициониот партнер во Владата ДУИ, за да се носат паралелни одлуки за пописот. -Предлагаме да се користат терминалите за отпечаток со прст а вашите оправдувања се дека нема финансии за такво нешто, додека истите нема да креираат финансиски импликации затоа што ќе бидат секако набавени, а притоа се набавуваат стотици компјутери како финансиски издадок, вели Јорданов кој дополни дека нема никаква логика зашто не беа прифатени тие амандмани кои ги предложи ВМРО-ДПМНЕ.