Научници од САД спроведоа широка генетска анализа на т.н. органоиди, на кои им е овозможено да се развиваат и да растат во лабораториски чинии и до 20 месеци. Она што го откриле е дека вештачките мозоци растат во фази и во согласност со внатрешниот часовник, а тој внатрешен часовник се совпаѓа со развојот на мозокот кај доенчињата.

Истражувањето сугерира дека органоидите можат да се развијат понатаму од феталниот стадиум, што е спротивно на она што се веруваше досега. Со оглед на тоа откритие, органоидите на мозокот можеби можат да дозреат до таа мера за научниците да можат да ги искористат за истражување на болестите на мозокот кај постарите луѓе како што е деменцијата.

Никој досега ги нема одгледано и карактеризирано овие органоиди на толку долго време, ниту има докажано дека ќе го рекапитулира развојот на човечкиот мозок во некакви лабораториски услови, вели авторот на студијата Даниел Гешвинд од Универзитетот Калифорнија во Лос Анџелес.

Покажавме дека тие органоиди можат да созреат и да реплицираат многу аспекти од развојот кај луѓето, што ги прави добар модел за проучување на човечките болести, додава Гешвинд.

Тој и неговиот тим одгледале органоиди на мозокот користејќи т.н. индуцирани плурипотентни матични клетки, од кои може да се развијат многу други типови на клетки. Матичните клетки кои ги користеле се добиени од клетки на кожата и крв кои се репрограмирани да се вратат во ембрионална состојба. Кога тие клетки ќе се изложат на соодветна мешавина од хемикалии во соодветни услови се развиваат во клетки на мозокот и се самоорганизираат за да произведат тридимензионални структури кои реплицираат одредени аспекти од развојот на вистинскиот човечки мозок.

Научниците веќе користат органоиди од човечкиот мозок за проучување на невролошки пореметувања од типот на аутизам, епилепсија и шизофренија. Ова е неверојатно откритие. Покажавме дека постигнавме постнатално созревање после 280 дена во култура и потоа почнуваат да моделираат аспекти на мозокот на доенче, вклучувајќи и познати физиолошки промени во сигнализирањето на невротрансмитерите, велат научниците.

Нивното истражување е објавено во научното списание Nature Neuroscience.

(Daily Mail)

(фото: Freepik)

Сподели!