Највисока стапка на пренесување на коронавирусот има во домаќинствата Александра Спасеска 30.11.2020 / 09:34 Здравје

Според студијата на Covid-19 Response Team на Империјал колеџ во Лондон, спроведена во соработка со повеќе партнери, асимптоматските пациенти имаат четирипати помала веројатност да ја шират инфекцијата со новиот коронавирус SARS-CoV-2 отколку симптоматските пациенти.

Истражувачите идентификуваа вкупно 97 студии за пренесување инфекцијата со контакт, од кои 45 ги исполнија критериумите за вклучување за мета-анализата.

Овие извештаи беа анализирани за да се „процени стапката на секундарен напад (SAR) и да се набљудува бројот на репродукции во различни средини и да се испитаат разликите според возраста, статусот на симптомите, времетраењето на изложеноста и големината на домаќинството.

Според студијата, шансите асимптоматски пациент да зарази близок контакт е 3,5 проценти во споредба со 12,8 проценти кај пациенти со симптоми. Просечниот број на луѓе во домаќинството кои заразеното лице ќе ги зарази (репродуктивниот број) се проценува на 0,96 (95% CI: 0,67-1,32), се вели во извештајот.

„Оваа анализа дава некои од првите докази дека асимптоматските инфекции се значително помалку заразни од симптоматските случаи“, рече професорот Нил Фергусон, автор на извештајот во статијата објавена на веб-страницата на Империјал колеџ.

Поголем ризик во домаќинствата

Истражувачите, исто така, ја проучувале стапката на трансфер во различни услови и откриле дека стапката на трансфер е поголема во домаќинствата отколку на патувања, социјални собири, на работно место и меѓу повремени блиски контакти. Шансите за пренесување на инфекцијата во домаќинството се 21,1 процент.

„Со оглед на тоа што многу земји ги повикуваат граѓаните да останат дома, со претстојните празници и случаи на самоизолација во домаќинството, нашите резултати покажуваат дека веројатно ова место ќе продолжи да биде важно за одржување на преносот на вирусот“, вели Хејли Томпсон, еден од авторите на студијата.

Истражувачите забележаа дека податоците за преносот на вирусот на работното место, во домовите за стари лица и училиштата се ограничени и затоа се потребни дополнителни истражувања.

коронавирус COVID-19 Автор/Извор А.С. Прикажи во метро On