Најдобриот фудбалер на сите времиња Лионел Меси одлучи да ја прекине војната со раководството на Барселона и да ја смири тензијата која постоеше во клубот последниот месец.

Во овој период Аргентинецот побара трансфер од Барселона, потоа се лутеше што е продаден Луис Суарес и во ниеден момент не ги поштеди претседателот Жосеп Бартомеу и неговите соработници. Сепак, во интервју за каталонскиот весник Спорт стави крај на сето ова.

„По сите случувања и несогласувања, сакам да завршам со сето ова. Мораме да бидеме обединети, за нас најдоброто допрва следува. Ја прифаќам одговорноста за сите мои грешки, ако тие постоеја. Сето ова го правев за да го засилам и подобрам клубот. Сакам да им испратам порака на навивачите дека, ако биле вознемирени од моите постоапки, тоа го направив од најдобар интерес за Барса и во тоа не треба да се сомневаат“, истакна Меси.

Барселона добро ја почна сезоната, победувајќи го Виљареал со 4-0 во првото коло, а во вториот круг гостува кај Селта која во Виго не ја победила од 2015 година.