Челзи минатото лето имаше преоден рок за паметење. Клубот од „Стемфорд Бриџ“ потроши 300.000.000 евра, но резултатите не се на нивото кое се очекува.

Освен тоа, Лампард со сето тоа како да го погази она од дебитантската сезона во Челзи, кога во првиот тим промовираше цела една плејада на талентирани играчи од клупската академија. „Сините“ играа атрактивен фудбал ги освоија симпатиите, но повторно станаа желни за експресни титули и успеси.

Иако сите засилувања кои пристигнаа претставуваат млади и перспективни играчи, со што продолжува планот за создавање на една нова генерација составена од млади ѕвезди, сепак сето тоа сега е под лупа на британската јавност бидејќи покажа голем број мани.

Лампард се соочува со голем притисок и да не беше клупска легенда, веројатно одамна ќе добиеше отказ. Но, наместо тоа, раководството ќе продолжи да го гради тимот по негов вкус, а најнова желба, според престижниот и добро известниот „Атлетик“ е напаѓач од светска класа, а мета е – Ерлинг Халанд.

Како што наведува новинарот Дејвид Орнштајн, намерата на Челзи е да тргне на се или ништо со цел да го добие потписот на Халанд. Тоа јасно значи дека Челзи е подготвен по четврти пат во последните четири години да го сруши клупскиот рекорд по Алваро Мората (66.000.000 евра), Кепа Аризабалага (80.000.000 евра) и Каи Хаверц (над 80.000.000 евра).

Халанд со Дортмунд има силен договор, кој дури од летото 2022 година ќе има активирана откупна клаузула од 75.000.000 евра, што значи дека пред тоа цената ќе биде значително поголема, бидејќи Борусија ќе ја одредува цената.

Интересот за Норвежанецот веќе сега е огромен. Претседателот на Реал смета дека Халанд е идеален наследник на Бензема и партнер на Килијан Мбапе. Првичната идеја на Реал е со сите сили следново лето да тргне по Мбапе, заедно со Камавинга и Алаба, додека Халанд ќе биде мета дури во 2022 година.

Од неодамна Халанд силно се поврзува и со Манчестер Сити. „Граѓаните“ бараат замена за Серхио Агуеро, а Халанд е означен како идеално решение и проект за следната деценија.

Кога станува збор за Челзи, веројатно најголемата пречка не би бил Дортмунд, туку Мино Раиола. Веројатно најмоќниот агент на денешницата наводно и понатаму е лут на Челзи поради тоа што Лукаку по големиот број позајмици не заврши на „Стемфорд Бриџ“, туку беше продаден во Евертон, од каде пристигна во Манчестер Јунајтед.

Лукаку во меѓувреме го промени агентот, откако дозна дека Мино Раиола му го саботирал потенцијалното враќање во Челзи, но Раиола и понатаму е лут. Сепак, за вистинска сума на пари и таа пречка не би била непремостлива. Ако Халанд дојде во Челзи, тогаш Тимо Вернер ќе се пресели на лево крило, каде се повеќе и повеќе настапува откако летоска дојде од Лајпциг за 60.000.000 евра.