Најдобриот дефанзивец на Ливерпул, Вирџил ван Дајк, кој повеќе од четири месеци е надвор од терените поради повреда на вкрстените лигаменти на коленото оваа среда по прв пат се појави на тренинг на англискиот шампион.

Неговото враќање на теренот оваа сезона и понатаму е под знак прашалник, но тој за прв пат од 17 октомври и кобниот дуел со Евертон излезе на терен. Секако, тој не работеше со остатокот од екипата, туку индивидуално тренираше со топка со спроведување на други елементи карактеристични за оваа фаза од рехабилитацијата.

Fantastic to see Virgil van Dijk back on the pitch. pic.twitter.com/ttUTbHVhhv

— DaveOCKOP (@DaveOCKOP) February 24, 2021

Останува да се види кога опоравувањето на холандскиот фудбалер ќе биде комплетирано за да го видиме и на официјални натпревари.

Освен Ван Дајк, радосна вест за Јирген Клоп е и опоравувањето на напаѓачот Диого Жота, кој не беше на терен од почетокот на декември.

Ливерпул минатиот викенд беше поразен во градското дерби од Евертон што е нивни четврти последователен пораз во првенството оваа сезона, па сега заостануваат дури 19 бода зад лидерот Манчестер Сити.

Шанса за крај на очајната серија која датира од почетокот на февруари ќе има во недела на гостувањето кај последнопласираниот Шефилд.