Кога COVID-19 ќе стане лесна болест како настинка? Александра Спасеска 20.01.2021 / 14:19 Здравје

Нова студија на американски научници предвидува дека SARS-CoV-2, вирусот што предизвикува COVID-19, со тек на време ќе стане помалку заразен и ќе се појави сезонски, заедно со други патогени од семејството на коронавируси кои предизвикуваат лесна настинка.

Но, тоа ќе се случи дури откако SARS-CoV-2 ќе стане ендемски вирус, односно кога нема да предизвикува масовна зараза или сериозни болести, велат научниците од Универзитетот Емори и државата Пен.

Нивната студија е објавена во списанието Science.

„Кога вирусот ќе достигне ваква ендемска состојба зависи од брзината на неговото ширење и од стапката на вакцинација“, изјави за The New York Times водечката авторка на студијата Џени Лавин од Емори.

„Значи, треба сите да се изложат на вакцината што е можно побрзо“, истакна таа.

Истражувањето е засновано на шест коронавируси

Нивното истражување се заснова на шест човечки коронавируси, од кои четири редовно се шират меѓу луѓето и предизвикуваат само благи симптоми. Другите двајца, тешкиот акутен респираторен синдром (SARS) и блискоисточниот респираторен синдром (MERS), се појавија во последно време и резултираат во висока смртност, но имаат слична генетика како коронавирусот кој предизвикува COVID-19.

Научниците сè уште проучуваат колку долго траат антителата и другите имунолошки клетки откако луѓето прележале COVID-19. Досегашните сознанија сугерираат дека имунитетот што ја блокира инфекцијата е релативно краток, но затоа имунитетот кој ги ублажува симптомите е долготраен.

Ова значи дека некое лице може да биде заразено со коронавирус неколку пати, но секој следен пат не би бил толку сериозен како првиот, што е слично на влијанието на настинките врз телото.

Откако повеќето луѓе ќе стекнат заштита од COVID-19, или преку природна инфекција или преку вакцинација, на коронавирусот најмногу ќе бидат изложени малите деца, а кај нив болеста се манифестира со благи симптоми и поминува полесно.

Но, без масовна вакцинација, ќе бидат потребни години и многу мртви за да се случи тоа, велат научниците.

Дури и во случај на појава на нови соеви на вирусот, како оној што сега се шири низ Велика Британија, научниците тврдат дека имунитетот стекнат од претходните соеви е „доволно силен за да спречи сериозни болести“. Исто како што е случај со четирите коронавируси кои предизвикуваат настинки во кои имунитетот се зајакнува со секое ново заболување.

коронавирус COVID-19 Автор/Извор А.С. Прикажи во метро On