Општо е мислењето дека Мурињо е прегазен од времето, дека новите работни позиции ги добива на сметка на старите засилуги. Со остварените резултати во последно време не може да се брани од овие констатации. Бидејќи за само една и пол година, откако од Маурисио Покетино го презеде тогашниот финалист во ЛШ, Жозе Мурињо успеа да го врати на „фабрички подесувања“. Оваа сезона успеа и да го уназади.

Доби целосна поддршка од Даниел Леви, првиот човек на Тотенхем му ги исполни трансфер желбите, само за неговиот тим на полусезона да се „дави“ на средина од табелата, притоа без никакви назнаки дека ситуацијата би можела да се поправи. Ситуацијата оди на полошо, бидејќи лондонскиот тим на последните шест натпревари забележа пет порази и Лигата на шампионите од недела во недела се повеќе делува како недостижна цел.

Поради тоа, пишува угледниот „Телеграф“, следните две недели ќе бидат клучни. Не само за амбициите на Тотенхем во оваа сезона, туку и за иднината на Мурињо на „Вајт Харт Лејн“. Во тој период Спарси ги оекуваат натпревари со Волфсбергер во Лигата на Европа, а потоа и во првенството со Барнли, Фулам и Кристал Палас.

На страна натпреварот во ЛЕ, Тотенхем по убедливите 4:1 во првиот меч, го очекува рутинско одработување на работата во реваншот, но преостанатите три меча во Премиер лигата, доколку не испаднат според планираното, би можеле да го одредат статусот на Мурињо кај Даниел Леви. Доколку Португалецот пред дербито на Северен Лондон со Арсенал не излезе со максимални девет бода од споменатите мечеви, првиот човек на Тотенхем ќе започне да го подготвува теренот за првата алтернатива на Мурињо – Јулијан Нагелсман, пишува „Телеграф“.

Сепак, во случај на неуспех на Мурињо во следните 14 дена, тренерот на Лајпциг нема да пристигне на „Вајт Харт Лејн“ оваа сезона, бидејќи еден од најталентираните тренери на светот, и покрај желбата да работи во Премиер лигата, нема намера да го напушти својот тим среде сезона.

Една од причините е и од финансиска природа, со оглед на тоа дека Мурињо во Тотенхем има 17.500.000 евра годишна плата, што би барало дополнителни трошоци. Поради тоа, „Специјалниот“ до крајот на сезоната ќе има шанса да направи пресврт во случувањата во своја корист и со освојување на првиот трофеј за Тотенхем во последните 13 година барем уште малку да го продолжи престојот во Лондон.

Шанса за такво нешто ќе има во финалето од Лига Купот против Сити или преку Лигата на Европа, кој речиси извесно е единствениот начин за Тотенхем следната сезона повторно да игра во ЛШ. Португалецот неодамна истакан дека и покрај можноста преку ЛЕ да дојде до ЛШ, сепак ќе нападне место во Топ 4 во Премиер лигата.