Македонскиот фудбал од денеска има уште еден играч во странство, откако 17-годишниот Христијан Георгиевски потпиша за 23-кратниот унгарски шампион МТК од Будимпешта.

Екипите од оваа земја претходните години се покажаа како добра отскочна даска за нашите фудбалери, како Енис Барди кој од Ујпешт се пресели во Леванте или Бобан Николов кој од Фехервар замина во Лече. Георгиевски ги помина речиси сите возрасни категории во Работнички, член е на У-17 репрезентацијата на Македонија и многумина му предвидуваат блескава играчка кариера.

„Пред се, сакам да им се заблагодарам на сите тренери со кои работев во Работнички, на целото раководство и на претседателот Драган Поповски кој се заложи за реализација на овој трансфер. Поминав прекрасно време во овој клуб и секогаш ќе ми остане во убави спомени.

МТК е врвен клуб, еден од најдобрите во Унгарија и со извонредна организациска поставеност. Сите тука ме примија фантастично, како свое дете и направија да се чувствувам како дома.

Се надевам дека МТК ќе биде првиот чекор во мојата интернационална кариера. Очекувам наскоро да добијам шанса во првиот тим и да покажам што знам. Можам да ветам дека ќе играм максимално одговорно и ангажирано и ќе ја оправдам довербата која во мене ја има раководството на клубот и стручниот штаб“, изјави Георгиевски за sportclub.mk.

Во првата полусезона, тинејџерот ќе настапува за У-19 тимот на МТК, но откако во април ќе наполни 18 години, се очекува да биде вклучен во првата екипа.