Екипата на Металург успеа да се пласира во групната фаза на Лигата на Европа. Ракометарите на Зоран Кастратовиќ вечерва загубија на гостувањето во Швајцарија кај Криенс со 22:21, но благодарение на победата во Скопје со 26:24, Металург ќе игра во групната фаза од новото натпреварување на ЕХФ.

По Еурофарм, Металург ќе биде вториот наш претставник во второто по квалитет натпреварување во ракометна Европа.

Во текот на првото полувреме постојано се играше гол за гол, со тоа што двете екипи повремено се менуваа во водство. Криенс испушти шанса кон крајот на првото полувреме да поведе со два гола разлика, а тоа го искористи Металург, кој најпрво израмни, а потоа и со двете одбрани во низа на Дупјачанец успеа да поведе. Но, ниту тимот од Автокоманда не искористи шанса за поголемо водство, па Криенс израмни на 10:10. Со ваквото темпо се продолжи до самиот крај, кога домаќините заминаа со предност од 12:11 на полувреме.

Ова беше најава за возбудлив втор дел. Криенс тргна агресивно на самиот старт и веќе успеа за брзо време да поведе со големи 15:12. Домаќините еден период ја одржуваа разликата од три гола, но на околу половина од второто полувреме, избраниците на Кастратовиќ го израмнија резултатот. Следуваа две нови грешки на Металург и ново водство на Криенс од два гола разлика, но не искористија и два напади за три предност. Резултатот се одржуваше на еден до два гола предност за домаќините, а на пет минути до крајот Криенс имаше водство од 21:20. Тоа беше јасен знак дека не очекува драматичен финиш.

На минута и пол до крајот Металург имаше 21:21, Харбуз ги донесе домаќините во водство од 22:21, а по промашувањето на Серафимов, домаќините не успеаја да се снајдат во целиот драматичен хаос на крајот и резултатот остана непроменет, со што Металург го завери пласманот во групната фаза.

Дупјачанец со 13 одбрани беше еден од најдобрите поединци кај Металург. Канкараш постигна пет погодоци, а по четири гола имаа Хорват и Тарабокија. На 1 октомври Металург ќе ги добие противниците од групната фаза во Лигата на Европа.