Дали е штетно да спиете со телефонот до кревет? Александра Спасеска 17.12.2020 / 13:21 Здравје

Телефонот стана суштински дел од нашите животи до тој степен што го ставаме покрај нас дури и кога легнуваме. Но, какво влијание имаат овие уреди врз нашето здравје додека спиеме?

Постојат многу митови за опасностите од зрачењето што го емитуваат паметните телефони, но има малку научно издржани аргументи за неговото влијание врз телото. Рускиот специјалист за дијагностика на дигитални производи Сергеј Кузменко одговори на ова прашање.

„Нема ништо лошо во тоа да се чува телефонот покрај креветот навечер. Науката не покажа дека неговото зрачење влијае на телото, не е пронајдена статистички значајна корелација помеѓу зголемениот ризик за развој на болести и употребата на мобилни телефони“, вели Кузменко.

Сепак, Кузменко предупредува дека е многу опасно долго да гледате во екранот на смартфонот пред да легнете, пренесува Спутник.

„Како прво, лошо е за видот. Ставањето на телефонот на режим за читање или ноќен/темен режим малку го намалува заморувањето на очите, но не го отстранува“, објасни тој.

„Второ, може да предизвика нарушувања на спиењето и од психолошка гледна точка (нервниот систем е напнат поради прочитаните вести, мозокот се обидува да ги процесира сите информации добиени од корисникот), и од физиолошка гледна точка (осветленоста, според некои истражувања, негативно влијае на производство на мелатонин, хормонот за спиење).

Значи, најдобрата опција е да го оставите смартфонот еден час пред спиење и да наместите аларм за наредниот ден“, советува Кузменко во изјава за порталот RG.

смартфон мобилен телефон Автор/Извор А.С. Прикажи во метро On