Глушец во замрзнат зеленчук ја прели чашата на трпението кај Иван Чулакоски од Битола. Згрозен и револтиран од она што го видел пред себе, на фејсбук објави слики на кои се гледа животното кое тврди дека било во производот кој го купил во КАМ маркет.

Чулакоски случајот го пријавил во подрачната единица на Агенцијата за храна и ветеринарство во Битола. Од Агенцијата пак соопштија дека веднаш забраниле промет на производот и наредиле негово повлекување од рафтовите на маркетите низ целата држава.

АХВ ќе изврши вонредни инспекциски надзори и ќе провери дали пласираните количини од овој производ се повлечени од малопродажната мрежа. Извршени ќе бидат и органолептички прегледи на одредени примероци, од секоја серија/лот на овој производ. Примероци за контрола на микробиолошките критериуми за безбедност на производот ќе бидат испратени за лабораториско испитување.

Агенцијата за храна и ветеринарство ги известува потрошувачите доколку купиле ваков производ, пред консумација внимателно да го отворат и прегледаат и доколку утврдат присуство на страни тела, истиот производ да го вратат на местото на купување и за тоа да ја известат АХВ, велат од Агенцијата.

Од таму додадаваат граѓаните ваквите случаи да ги пријавуваат до надлежните институции наместо на социјалните мрежи.

Компанијата КАМ пак ги повика инспекциските служби случајот да го истражат до крај. Велат дека тие соработуваат исклучиво со домашни и странски производители како и дистрибутери на храна кои ги поседуваат современите сертификати за квалитет.

Компанијата КАМ, по остварената комуникација со реномираниот производител на замрзнати производи беше известена дека согласно воспоставените европски контролни системи практично е невозможно да дојде до вакво контаминирање на производот имајќи го во предвид строго контролираниот тек на процесот на производство и поради тоа останува отворен за официјална истрага базирана на документите од надлежните инспекциски органи во нашата држава, велат од КАМ.

Од Организацијата за заштита на потрошувачи се запознаени со случајот иако не бил пријавен до нив. Тие ваквите поплаки ги проследуваат до АХВ која постапува по нив.

До АХВ од почетокот на годината имало и претставки од граѓаните во кои пријавиле пластика во производ, но и стакло шајка како и хируршка ракавица.

Фото за вовед: YouTube видео: Категорија: БизнисНовинар: Александра Костовска