Шумскиот пожар што изби на 26 август меѓу селата Ораовец и Војница во Општина Чашка, се уште тлее, а изгореа повеќе стотина хектари ниско стеблеста дабова шума.

Во гаснење на пожарот како и во изминатите денови со огнената стихија која беснее се борат пожарникари ТППЕ од Велес со четири противпожарни возила, а на помош им е противпожарно возило од Општина Чашка, заедно со вработени од ЈП „Македонски шуми“ Подружница Велес и вработени од ЈКП „Дервен“ и припадници од Армијата од велешкиот гарнизон како и од Дирекцијата за заштита и спасување.

Како што информира за МИА, Љупчо Лепидовски командир на ТППЕ Велес, во очекување се да пристигнат хеликоптери од Дирекцијата за заштита и спасување.

– Осми ден се бориме со огнената стихија која за жал проголта повеќе стотина хектари ниско стеблеста дабова шума во овој убав регион на Општина Чашка, очекуваме што поскоро да ја добиеме ветената помош со хеликоптери од Дирекцијата за заштита и спасување, а за час поскоро, овој голем пожар да биде изгаснат, информира Лепидовски.